Pintor nasakote sa pagbebenta ng endangered bird species

ARESTADO ang isang 35-anyos pintor na nasakote sa isinagawang entrapment operation ng Malabon Police habang nagbebenta ng Lawin, isang nanganganib na uri ng ibon sa kanyang kliyente sa Malabon City.

Sa report mula sa tanggapan ni Northern Police District (NPD) Director P/BGen. Josefino Ligan, nahuli ng Malabon Police ang suspek na si alyas John Carlo matapos kumagat sa pain ng pulisya matapos tanggapin ang P15,000 marked money bilang bayad sa biniling Brahminy Kite o Lawin, itinuturing na isa sa mga endangered bird species sa bansa.

Ayon kay Malabon police chief P/Col. Jay Baybayan, nagsagawa ng entrapment operation dakong 1:00 ng madaling araw nitong Biyernes sa Hiwas St., Brgy. Longos matapos ang naganap na transaksiyon sa social media account ng suspek na nagbebenta ng endangered species.

Kasalukuyang nakakulong ang suspek sa Malabon custodial facility habang hinihintay ang pagdinig sa kasong paglabag sa RA 9147 o Wildlife Resources Conservation and Protection Act. (VICK AQUINO)