Netizens kinampihan resbak ng anak ni Dr. Padlan

PUSH NA’YAN
ni Ambet Nabus

NAKAKALOKA ang naging reaksiyon ng netizen hinggil sa tila resbak niyong anak ng doctor-lover ni Kris Aquino sa “painful truth” post ng huli.

May mga naniniwala na nagpapa-awa na lang si Kris sa kanyang sitwasyon.

“Ang hilig-hilig niyang mag-drama pag lovelife niya ang usapin. Naroong gamitin pa ang sakit niya para kaawaan siya at nag-aakusa siya ng dating karelasyon na kesyo ganyan, ganito,” reaksiyon ng isang netizen.

At dahil may inilabas ngang pahayag ang anak ni Dr. Mike Padlan, hayun parang na-boljak si Kris at sinampal tuloy ito ng katotohanan na hindi nga lahat ay keri niyang paikutin.

May nabasa pa kaming thread sa socmed na inisa-isa ang lahat ng mga lalaking naugnay kay Kris romantically na hindi naging maganda ang tingin sa kanila ng public after nilang maghiwalay.

Nandiyan sina Phillip Salvador, Joey Marquez, James Yap, Miel Sarmiento, Mark Leviste, at ang latest ngang si Dr. Padlan.

Hindi pa raw kasama riyan iyong naging “fling” o iba pang nakarelasyon ni Kris. 

Sa hinaba-haba ng matatawag nating pagdurusa ni Kris sa kanyang medical condition, hindi pa ba sumagi sa isip niya na baka nga “kapalaran” na ang gumagawa ng paraan para ipaalala sa kanya na hindi siya ‘diyos?’

Aguy uy!