HATAW! D'yaryo ng Bayan hatawtabloid.com
PINURI nina Nicole Hyala at Diego Bandido, hosts ng popular na Love Radio program na Kumikinang na Tambalan at mga iskolar ng college—ang free college law ni dating Senador Bam Aquino.
Anila, dalawa na ang free college na nagbibigay pag-asa sa mga estudyante na ituloy ang kanilang pangarap na makatapos ng pag-aaral.
“Ito ang nakalulungkot kung minsan. Maraming gustong mag-aral pero walang opportunity. Pero with that law, napakalaking bagay talaga. Sobra,” sabi ni Diego noong January 28, 2025 episode ng programa.
Sumang-ayon naman si Nicole. “Ang hirap mag-aral pero mas mahirap ang walang pinag-aralan. Kaya mas maganda na mayroon. Binanggit ni Nicole na masuwerte siya at natapos niya ang kanyang kurso sa Assumption College sa pamamagitan ng scholarship dahil ang kanyang nanay ay empleado ng paaralan.
“Hindi ko makalilimutan kung paano talaga pinush ng nanay ko na makapag-aral talaga ako ng maayos dahil iba talaga ang edukasyon,” sabi ni Nicole na naging president pa ng Assumption Student Council.
Para kay Diego ang kagustuhang iangat ang pamilya mula sa kahirapan ang nagtulak sa para mag-aplay ng scholarship mula sa isang foundation. “Ang haba ng pila. Nagulat ako nakapasa ako. Ang sarap ng feeling noong nakuha ko iyong scholarship at natapos ko ang four-year course,” anito.
Sinabi naman ni dating Senador Bam, na naging guest sa kanilang show, ang free college law ay nakatulong sa milyon-milyong mag-aaral sa buong bansa na kapos sa budget para makatapos ng kolehiyo.
“Pag-ikot natin, marami talagang magulang, kabataan, nakapagtapos kami dahil sa batas. Ang ganda ng batas na iyan dahil nakatutulong sa tao,” sabi ni Bam.
Kung mahahalal sa senado, balak ni Bam na palawakin ang free college law at tumulong sa pagkakaroon ng trabaho ang mga Filipino. (MV)
