HATAW! D'yaryo ng Bayan hatawtabloid.com
PAG-AAGAWAN ng kabuuang 350 kabataang tri-athletes ang nakalaang silya sa gagawin na Asian Youth Games (AYG) sa pagsikad ngayon ng National Age Group Triathlon (NAGT) Series sa Subic Bay Freeport.
Sinabi ni Triathlon Philippines (TriPhil) president Tom Carrasco na nakataya ang mga importanteng puntos para sa kategorya na 6-years old under, 7-to-8 years old, 9-to-10 years old, 11-to-12 years old, at 13-15 years-old Super Tri-Kids na pagbabasehan para sa ipapadala ng bansa sa AYG.
“These age group events are all basis para sa ipapadala natin sa AYG, and also to these year’s Southeast Asian Games and to the Asian Games, and maybe to the Olympics,” sabi ni Carrasco.
Unang isasagawa Sabado ang Super Kids division at Under 15 Youth bago sundan sa Linggo ng Elite at Junior Elite na katatampukan naman ng mga kabilang sa national developmental pool at mga papaangat na bagong triathletes.
Idinagdag ni Carrasco na ang mga oras ng mga triathletes sa resulta ng NAGT ay isasaalang-alang sa pagraranggo ng mga Filipino athletes para sa biennial games sa Disyembre.
Dalawang atleta para sa indibidwal na mga event sa men at women triathlon at siyam naman para sa team relays ang bubuo sa pambansang koponan.
Pagkatapos ng National Age Group Triathlon, gaganapin ang mga karera sa Aquathlon at Duathlon sa Marso 1- 2 sa Ayala Vermosa Sports Hub sa Cavite.
Magkakaroon din ng NAGT 2025 sa Visayas na gaganapin sa Ormoc City at sa General Santos City para naman sa mga taga-Mindanao na nagnanais na maging parte ng national team. (Hataw Sports)
