HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez
NAPAYAKAP bigla si Alex Gonzaga sa asawang si Mikee Morada kahapon ng umaga sa ginanap na Grand Float Parada para sa kapistahan ng Lipa. Ang dahilan, muntik na itong matumba.
Inanyayahang umakyat ng entablado ang mag-asawang Mikee (tumatakbong Vice Mayor ng Lipa) at Alex na bumaba mula sa kanilang float matapos ikutin ang ilang bahagi ng Lipa City para bumati ay magbigay-pugay sa mga taga-Lipa na naghihintay sa kanilang pagdating.
Umakyat din sina Luis Manzano (tumatakbong Vice Governor ng Batangas) kasama ang asawang si Jessy Mendiola gayundin si Ryan Christian Santos Recto (tumatakbong Congressman ng 6th district ng Batangas).
Pagkaraan ng ilang pagkaway-kaway, picture taking, at pagbati sa mga Lipeno, roon na yumakap si Alex kay Mikee at napansin naming maputla ang aktres/vlogger.
Kaagad siyang inakay ng asawa at akmang kakargahin ni Mikee subalit nakaya pa namang lumakad ni Alex pababa ng hagdanan at lumakad sa sasakyang naghihintay sa likuran ng stage sa C.M. Recto.
Dahil sa pangyayari agad naming naitanong sa Road Manager ni Alex, si JC Bagio ang dahilan ng pagkahilo niyon.
Biniro pa nga namin si Bagio kung naglilihi na ba si Alex at ipinaliwanag nitong, kulang sa tulog, sobrang pagod at init ang dahilan ng muntik pagko-collapse ni Alex.
“Super late na kasi nakatulog si Alex kagabi dahil may pinanggalingan kaming event,” paunang sabi ni Bagio. “Tapos ang aga gumising kanina para sa parada. Tapos ang init dahil sa pag-ikot at ang daming tao.
“Sobrang pagod na,” katwirang kuwento ni Bagio.
Sayang, akala pa naman namin ay buntis na si Alex.
“Sana nga po pero hindi po,” sagot pa ni Baguio.
Samantala, sobrang nasiyahan ang mga Lipeno sa dami ng mga artistang nakiisa sa kanilang kapistahan.
Pagkatapos ng parada dumiretso sina Luis, Jessy, at Ryan sa San Sebastian Cathedral para dumalo ng misa na in-officiate ni Lipa Archibishop Gilbert Garcera.
