HATAW! D'yaryo ng Bayan hatawtabloid.com
NANGAKO ang Philippine National Volleyball Federation (PNVF) at Japan Volleyball Association (JVA) na patuloy na palalakasin ang kanilang ugnayan habang layunin nilang itaas ang antas ng popularidad ng sport sa kontinente.
Pinangunahan ni Japan Minister at Consul General Takahiro Hanada ang turnover ng mga gamit para sa volleyball mula sa JVA noong Huwebes sa bagong PNVF Office sa The Bonifacio Prime sa Taguig City at ipinaabot ni Asian Volleyball Confederation president at FIVB executive vice president Ramon “Tats” Suzara, siya rin ang PNVF president, ang kanyang pasasalamat dahil nakatanggap ang Filipinas ng isa pang malaking tulong, siyam na buwan bago ang pagho-host ng FIVB Men’s Volleyball World Championships.
“Sa pagdami ng mga dumadalo at ang pag-usbong ng mga bagong talento, naniniwala ako na ang aming kooperasyon ay dumating sa isang kapanapanabik na panahon para sa kultura ng volleyball,” sabi ni Hanada.
“Masigasig kaming nagsasamantala sa pagkakataong ito upang suportahan ang umuusbong na volleyball scene ng Filipinas… ipinagmamalaki naming ibigay ang mga kagamitang ito sa mga kabataang Filipino na sabik matuto,” dagdag ni Hanada. “Nawa’y maging mahalagang bahagi ang mga volleyball na ito sa pagpapalakas ng mga pangarap at koneksiyon ng kabataang Filipino.”
Nagpasalamat si Suzara sa malaking tulong na ibinigay ng JVA sa mga pagsusumikap ng PNVF na matuklasan ang mga talento at palawakin pa ang bilang ng mga tagapanood ng sport.
“The Philippines is a volleyball country,” wika ni Suzara. “Ito ang pangunahing slogan namin ngayon.”
“Ang mga kagamitang ito ay magpapalakas ng pagpupursigi ng mga kabataang manlalaro sa mga lalawigan… Ang mga bolang ito ay makararating sa maraming kabataang manlalaro sa Mindanao, Visayas, at Luzon,” dagdag ni Suzara habang nagpapasalamat kay Hanada at sa JVA para sa patuloy na suporta.
