HATAW! D'yaryo ng Bayan hatawtabloid.com
Manila — Tinalo ng Surigao Fianchetto Checkmates ang Iloilo Kisela Knights sa Quarterfinals ng Professional Chess Association of the Philippines-PCAP para harapin ang Camarines Soaring Eagles na nasa gabay ni Engr. Jojo Buenaventura, ang top seed sa Southern Division para sa Semi Finals Sabado ng gabi.
Ang kapana-panabik na quarter finals ay napanalunan ng Surigao sa pamamagitan ng Armageddon, 2-1, na ginanap sa pamamagitan ng Chess.com Platform noong Miyerkoles ng gabi.
Sa panalo ni NM Rogelio Enriquez, Jr., versus NM Fritz Porras at ang draw game ni IM Rolando Nolte laban kay NM John Michael Silvederio. Bilang itim na piyesa, na may partida sa oras, ang mga puntos ay iginawad kay IM Nolte ayon sa Armageddon ruling. Nanalo si NM Rolly Parondo, Jr., laban kay NM Joey Florendo para makaiskor para sa Iloilo.
Nauna rito, ang unang set ay napanalunan ng Iloilo 13-8, habang kinuha ng Surigao ang ikalawang laban, 11.5-9.5 para i-set up sa tie break sa pamamagitan ng Armageddon. Ito ang kanilang ikalawang laban sa Armageddon dahil noong nakaraang season, nagkasagupaan din sila sa tie break at nanalo ang Iloilo.
Sinabi ni AGM at Honorary NM Rey C. Urbiztondo, ang may-ari ng team at playing coach, sa wakas ay unang beses nilang makapasok sa semis dahil palagi silang nasa quarter finals tuwing conference ngunit hindi pa para sa semis at tinatalo ang dating kampeon na Iloilo ay isang malaking improvement para sa Mindanao team.
Ang Surigao Team ay sinusuportahan ni District Engr. Dohjie Morales ng DPWH bilang team manager at itinataguyod ni Cong. Ace Barbers.
Samantala, tinalo ng Davao Chess Eagles ang Tacloban Vikings sa 2 set, 11.5-9.5, at 17-5, para ayusin ang final four showdown laban sa second seed Toledo-Xignex Trojans.
Ang PCAP, ang una at tanging play-for-pay na liga sa bansa, ay pinamumunuan ni President-Commissioner Atty. Paul Elauria, Chairman Michael Angelo Chua, at Treasurer Atty. Arnel Batungbakal. (MARLON BERNARDINO)
