Videographer niratrat sa NLEX

NATAGPUANG duguan sa loob ng kanyang sasakyan ang isang lalaki sa bisinidad ng North Luzon Expressway (NLEX) sa bahagi ng Brgy. Dampol 2nd A, Pulilan, Bulacan kamakalawa ng hapon.

Sa ulat na ipinadala kay Police Colonel Relly B. Arnedo, provincial director ng Bulacan PPO, ang biktima ay kinilalang si Aris Magayanes y Apostol, 42 taong gulang, may live in partner, videographer at residente ng Brgy., Pag asa, Binangonan Rizal.

Ayon sa ulat, dakong alas-4:30 ng hapon ay nakatanggap ng tawag sa telepono ang Pulilan MPS ukol sa insidente ng pamamaril sa loob ng NLEX M 45 +500 Southbound Lane sa loob ng Brgy., Dampol 2nd A, Pulilan, Bulacan.

Kaagad nagresponde ang mga awtoridad sa lugar upang alamin ang ulat at batay sa inisyal na imbestigasyon, sinabi ng NLEX Investigator na si Peter Paul Viray na nakatanggap din sila ng tawag sa telepono na nag-uulat ng isang vehicular accident sa tinukoy na lugar.

Pagdating sa pinangyarihan, nadiskubre nila ang isang puting Nissan Terra na may plate number na GAX 2732, na patungo sa timog ng Maynila, na aksidenteng nabangga ang mga bakal na rehas sa gilid ng kalsada.

Sa pagsisiyasat pa ay natuklasan nila ang isang butas ng bala ng baril sa bintana ng driver’s side kung saan nagtamo ng sugat ang biktima mula sa tama nito.

Kaagad namang dinala ang biktima sa Bulacan Medical Center, Malolos Bulacan para malapatan ng lunas habang patuloy ang pagsasagawa ng imbestigasyon sa insidente. (MICKA BAUTISTA)