HATAW! D'yaryo ng Bayan hatawtabloid.com
RATED R
ni Rommel Gonzales
MARAMING artistang Filipino ngayon ang nasa Hollywood, sa California, Amerika.
Ginaganap kasi roon ang Manila International Film Festival na kalahok ang sampung Filipino films na kasali sa matagumpay na Metro Manila Film Festival noong Disyembre.
Hangad ng MIFF na ibandera at ipagmalaki ang kagandahan at kalidad ng mga pelikulang Filipino kaya naman marami sa mga artista sa sampung film entries ay lumipad pa-USA.
Kabilang rito ang ilang Kapuso stars tulad ni Dingdong Dantes na bitbit ang bandera ng Pilipinas para sa Rewind at Firefly na kapwa siya kasama.
Naroroon din si Kapuso actress and Nailandia Nail Spa and Salon owner na si Ysabel Ortega na isa rin sa mga bumida sa critically-acclaimed film na Firefly nina Alessandra de Rossi at Best Child Performer Euwenn Mikaell.
Nasa USA rin si Beauty Gonzalez para sa (K)ampon.
Wala man si Pokwang ay nasa Amerika naman si Eugene Domingo na bida rin sa Becky And Badette.
Bukod sa mga nabanggit na mga Kapuso star, nasa California rin si Christian Bables na lead star sa Broken Heart’s Trip.
Dumalo rin sa MIFF si Christopher de Leon at si Film Development Council of the Philippines (FDCP) Chairman Tirso Cruz III para naman sa pelikula nilang When I Met You in Tokyo na lead female star ang MMFF Best Actress Vilma Santos.
