Senado ala-FPJ kung umaksiyon sa 2024 nat’l budget

ONIN’s THOUGHTS
ni Niño Aclan

SADYA talagang mabilis umaksiyon at kumilos ang senado. Kung sa pelikula, parang FPJ kung bumunot ng .45, walang mintis.

At iyon ang gustong tiyakin ng mga inihalal nating senador, hindi dapat reenacted ang budget para sa taong 2024.

Kaya hayan, maaga pa ay isa-isa nang tinatalakay ang mga panukalang budget ng iba’t ibang ahensiya ng pamahalaan gayondin ang tanggapan ng Pangulo at ikalawang Pangulo.

‘Yan ay dahil masipag din siguro at laging nakabantay ang pinuno ng Senate Committee on Finance na si Senador Sonny Angara.

Mahigpit na binubusisi ng mga miyembro ng komite ang bawat budget ng ahensiya ng pamahalaan at maging ang intelligence fund at confidential funds na hinihingi ng tanggapan ni Vice President at Education Secretary Sara Duterte ay hindi nakalusot sa pagbusisi ng mga senador.

Ngunit sa huli ay kanila rin naman itong inaprobahan bilang kortesiya sa tanggapan ng bise-presidente ngunit ang tanong ‘pag sa plenaryo kaya ay wala nang magaganap na pagbusisi ukol dito?

Basta target ni Senador Angara, bago matapos ang taon ay tapos na ang 2024 proposed national budget para malagdaan na rin ni Pangulong Ferdinand Marcos, Jr. 

Onin, huwag kang kukurap!