Bebot ginapang habang natutulog
KELOT NASAKOTE BAGO MAKATAKAS

ARESTADO ang isang lalaki matapos ireklamo ng isang dalaga ng pangmomolestiya at panggagahasa habang siya ay natutulog sa bayan ng Plaridel, lalawigan ng Bulacan, nitong Sabado, 12 Agosto.

Sa ulat na ipinadala kay P/Col. Relly Arnedo, Provincial Director ng Bulacan PPO, kinilala ang suspek na isang alyas Arnold, matagumpay na nadakip ng mga tauhan ng Plaridel MPS bago pa makalayo para magtago.

Batay sa reklamo ng biktimang hindi na pinangalanan, habang siya ay mahimbing na natutulog ay nakapasok sa kanyang kuwarto ang suspek.

Nagising na lamang siya nang maramdamang may nakapatong sa kanya at pilit inaangkin ang kanyang pagkababae pero nagtangka siyang manlaban upang ipagtanggol ang puri ngunit hindi niya nakaya ang lakas ng suspek.

Bago tumakas ang suspek ay nagbanta pang huwag isusumbong ang ginawa niyang kahalayan para walang masamang mangyari sa biktima.

Ngunit hindi natakot ang biktima at kasama ang mga kaanak ay nagsumbong sa tanggapan ng Plaridel MPS at sa maagap na pagresponde ng pulisya ay agad naaresto si alyas Arnold. Kasalukuyang nakapiit sa Plaridel MPS custodial facility ang suspek na nakatakdang sampahan ng kasong panggagahasa sa hukuman. (MICKA BAUTISTA)