HATAW! D'yaryo ng Bayan hatawtabloid.com
SINAMANTALA ng isang pinaniniwalaang notoryus na tulak ang malakas na ulan at pagbaha upang mailusot ang kalakal na droga sa bayan ng Sta. Maria, lalawigan ng Bulacan, ngunit hindi ito nakalusot sa matalas na pagmamanman ng mga awtoridad na nagresulta sa kanyang pagkakadakip nitong Sabado, 29 Hulyo.
Sa ulat na ipinadala ni P/Lt. Col. Christian Alucod, hepe ng Sta. Maria MPS, kay P/Col. Relly Arnedo, Provincial Director ng Bulacan PPO, kinilala ang arestadong suspek na si Benito Capili, Jr., alyas Unyo, residente sa Brgy. Lolomboy, Bocaue.
Nadakip ang suspek na nakatala bilang high value individual sa ikinasang buybust operation na isang pulis ang tumayong poseur buyer sa Brgy. Camangyanan, sa nabanggit na bayan.
Nakompiska mula kay Capili ang dalawang P1,000 bill marked money at apat na piraso ng selyadong pakete ng plastik na naglalaman ng hinihinalang shabu, may timbang na 60 gramo at tinatayang nagkakahalaga ng P408,000.
Sinabing ang suspek, mula sa Bocaue ang nagsu-supply ng ilegal na droga sa Sta. Maria at karatig-bayan. Sinamantala nito ang masungit na lagay ng panahon para mailusot ang kalakal pero natunugan din ng mga awtoridad.
Kasalukuyang nakapiit sa Sta. Maria MPS custodial facility ang suspek na nahaharap sa kasong paglabag sa RA 9165 o Comprehensive Dangerous Act of 2002. (MICKA BAUTISTA)
