HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
MAY karapatang matawag si Cristine Reyes na Vilma Santos ng bagong henerasyon dahil mahusay niyang nagampanan ang papel ni Helen na siya ring karakter ng Star for All Seasons sa pelikulang Minsan Pa Nating Hagkan ang Nakaraan na ginawang teleserye ng Studio Viva sa pakikipagtulungan ng TV5.
Pinagbidahan ni Ate Vi ang pelikulang Minsan Pa Nating Hagkan ang Nakaraan kasama sina Christopher De Leon at Eddie Garcia at idinirehe ng National Artist na si Ms Marilou Diaz Abaya.
“Maganda ang istorya na nakabase ang teleseryeng ito sa 2 hr classic movie na idinirehe dating Marilou Diaz Abaya noong 1983.
“Ngayon noong ginawa ng creatives ng Studio Viva in cooperation with TV5, ginawa namin iyong istorya na pang-teleserye na it will run for 13 weeks,” panimula ni direk Jerome Pobocan bago ang pagsisimula ng special screening and mediacon na ginawa sa Gateway Cineplex noong Sabado ng hapon.
Iginiit pa ni direk Jerome na dahil sa husay na pagganap ni Cristine sa teleserye, matatawag na Vilma Santos ng bagong henerasyon ang nakababatang kapatid ni Ara Mina.
And hindi naman malayong mabansagan nga si Cristine na bagong Vilma Santos ng bagong henerasyon dahil kung ilang beses na rin namang nabigyang pagkilala ang husay nito sa pag-arte at nagampanan niya ng ayos ang karakter ni Helen.
Tiyak na ang marami ang mag-aabang sa remake na ito ng TV5, na produced ng Sari Sari Network Inc. in collaboration with VIVA Entertainment, na bukod kay Cristine ay makakasama si Marco Gumabao na hindi na bago ang pagsasama dahil nagkatrabaho na sila Encounter at Di Na Muli ng TV5 pa rin. Sasamahan sila ng beteranong aktor na si Cesar Montano na mas magdadagdag pa ng lalim at kulay sa kanilang “love triangle.”
Tiyak tututukan ng Kapatid viewers ang kuwento ni Helen (Cristine) at ang pagkahati ng kanyang puso sa dalawa niyang mahal: si Rod (Marco), ang dati niyang kasintahan na iniwan siyang lito at sawi at si Cenon (Cesar), isang nakatatandang ginoo na paiibigin siyang muli. Ang kuwento ay iikot sa pag-ibig at paghihiganti na mag-iiwan ng katanungan sa mga manonood—kaninong pag-ibig ang magtatagumpay sa huli?
Ang revival ng classic drama na ito ay nagpapatunay ng dedikasyon ng TV5 sa paghahatid ng mga de-kalidad na entertainment content na magpapatibay sa kanilang afternoon program lineup.
Mapapanood ang Minsan Pa Nating Hagkan ang Nakaraan simula ngayong araw, Hulyo 25, Lunes hanggang Biyernes, 4:40 p.m. sa TV5 at 8:00 p.m. sa SARI SARI Channel, na available sa Cignal TV, SatLite Ch. 3, at Cignal Play.
