Christine napalaban sa aktingan 

PAMBUWENA-MANONG handog ng Vivamax ang pelikula ni Christine Bermas, ang Night Bird ngayong Enero 2023 kaya naman sobrang thankful at pasalamat ang aktres kay Boss Vic del Rosario at sa kanyang manager na si Len Carillo.

Umarangkada ang career ni Christine last year na pinapurihan siya sa mga pelikulang pinagbidahan niya tulad ng Relyebo kasama si Sean de Guzman at Scorpio Nights 3 kasama si Mark Anthony Fernandez.

At ngayong 2023 na buena manong handog ng Vivamax makakasama naman niya sina Sid Lucero, Mark Anthony Fernandez, Aaron Villaflor, at Felix Roco.

Hindi basta-basta ang mga kasama ni Christine kaya bukod sa mapapalaban siya sa hubaran, mapapalaban din siya sa aktingan sa apat na kasama niya sa Night Bird.

Kasama rin sa Night Bird  ang dalawang baguhang sexy star pero palaban din, sina Chloe Jenna at Alexa Ocampo.

Iikot ang kuwento sa tatlong magkakaibigan na walang awang pinagbubugbog at ginahasa ng isang grupo ng mga adik. Dahil dito, maghihiganti ang karakter ni Christine sa malupit at mapait na sinapit mula sa kamay ng kanilang mga rapist. Hindi siya titigil hangga’t hindi nakukuha ang hustisya sa nangyari sa kanilang magkakaibigan.

Ani Christine sa isinagawang mediacon, ibang-iba ang Night Bird sa mga nagawa niyang pelikula last year sa Vivamax. “It’s very different kasi ‘Relyebo’ is serious drama while ‘Scorpio Nights 3’ is very sexy, but this one, for the first time, nag-action ako.

“Dream come true ito for me, kasi noon ko pa gusto ko talaga mag-try ng action. Mahirap pala siya kasi very physical siya,” paglalahad ni Christine kaya naman kinarir  niya ang training para sa mga action scene na kailangan  sa movie.

“We trained for one week, how to do fight routines, how to hold a knife. And on the set, we have a coach para turuan kami sa aming fight scenes.

“Nakapapagod siya kasi nga naghihiganti ako rito sa mga lalaking humalay sa amin and may fight scenes ako with all of them. Abangan n’yo kasi very exciting ang buong movie,” sambit pa ni Christine.

Ang Night Bird ay idinirehe ni Law Fajardo at mapapanood na sa Vivamax simula sa January 13, 2023. (MValdez)