HATAW! D'yaryo ng Bayan hatawtabloid.com
NASAKOTE sa ikatlong pagkakataon sa ilegal na droga ang isang lalaki sa ikinasang buy-bust operation ng mga awtoridad sa Brgy. Seguna Pulo, sa bayan ng Lumban, lalawigan ng Laguna, nitong Martes ng madaling araw, 8 Nobyembre.
Kinilala ang suspek na si Mark Anthony Mercado, huli sa aktong nagbebenta ng isang sachet ng hinihinalang shabu sa police poseur buyer na tauhan ng Lumban MPS.
Nakompiska kay Mercado ang limang sachet ng hinihinalang shabu na tinatayang may timbang na 0.40 gramo at nagkakahalaga ng P3,500, basyo ng sigarilyo, timbangan, isang rolyo ng aluminum foil, dalawang stick na kawayan, lighter, gunting, isang glass tube, bag na kulay asul at itim, P500 marked money, at P200 hinihinalang drug money.
Ayon Kay P/Capt. Ed Richard Pacana, OIC ng Lumban MPS, pangatlong beses nang naaresto ang suspek kaugnay sa pagbebenta at pag-iingat ng ilegal na droga.
Kasalukuyang nakapiit ang suspek sa Lumban MPS Custodial Facility upang harapin ang kasong paglabag sa RA 9165 o Comprehensive Dangerous Act of 2002. (BOY PALATINO)
