HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
AYAW o hindi gumagawa ng pelikula sa labas si direk Joel Lamangan pero dahil kaibigan niya ang producer ng 3:16 Media Network na si Len Carillo, tinanggap niya ang Sa Kanto ng Langit at Lupa na ire-release sa Enero 2023.
Katunayan, paglalahad ni direk Joel mahirap gawin ang pelikulang idea mismo ni Len ang istorya at dinevelop nina Ma-An L. Asuncion-Dagnalan at kabiyak na si Michael pero hindi niya matanggihan si Len.
“Nahulog pa nga ako sa paghahanap ng location para sa shooting kasi nga gusto ni Len sa ilalim ng tulay eh ang hirap-hirap mag-shoot sa ilalim ng tulay lalo na kapag tag-ulan,” katwiran ni direk Joel.
Samantala, napag-usapan sa story conference ng pelikula ang pagiging istrikto at kinatatakutan si direk Joel.
Anang award winning director, “Natatakot ang mga artista na hindi gumagawa ng kanilang katungkulan sa shooting ko. Unang-una tanga. ‘Yun ang pinakamahirap dahil walang cure. Kapag ang artista nagkukunwari na alam niya, ‘yun ang tanga. Pinapagalitan ko.
“Mabuti nang sabihin nila na ‘direk hindi ko alam ituro po ninyo’ at sasabihin ko. Pero kung take 24 na, siyempre magagalit ka na. Siyempre magagalit din ang producer dahil madadagdagan ang taping, ang shooting.
“Pangalawa, ‘yung mga artistang may call time ng 8: 00 a.m. pero darating ng 12 noon. May iba pa darating ng 4:00 p.m. Magagalit na ako niyon at hahabulin ko sila ng saksak. Swelduhan din ako roon pero kailangan kong i-control sila.
“Kung mahusay ka, sasabihin ko naman ‘ang galing mo or ang husay mo.’ Pero kung hindi ka naman mahusay at hindi ka professional, makakatikim ka sa akin,” pangangatwiran pa ng direktor ukol sa pagiging istrikto niya.
Sinabi pa ni direk Joel na bago naman siya mag-umpisa ng shooting ay kinakausap muna niya ang mga artista at sinasabi niya ang mga dapat gawin at kung ano ang hindi dapat gawin ng mga ito.
Magbibida sa Sa Kanto ng Langit at Lupa sina Sean de Guzman, Marco Gomez, Royce Cabrera, Quinn Carillo, Rob Guinto, Jiad Arroyo at marami pang iba.
