HATAW! D'yaryo ng Bayan hatawtabloid.com
NADAKIP ng mga awtroridad ang dalawang lalaki matapos mahulihan ng baril at granada sa ikinasang buy-bust operation sa lungsod ng Cabuyao, lalawigan ng Laguna, nitong Martes ng madaling araw, 8 Nobyembre.
Sa ulat kay P/Col. Randy Glenn Silvio, OIC ng Laguna PPO, kinilala ang mga suspek na sina Jessie Gan at Franie Falle, kapwa mga residente sa nabanggit na lungsod.
Ayon sa Cabuyao CPS, nagsagawa ang ga operatiba ng buy-bust operation dakong 1:56 am kahapon kung saan nasakote ang mga suspek sa Brgy. San Isidro.
Nakompiska kay Gan ang isang kalibre .45 pistola, anim na live ammunitions, at boodle money, habang nasamsam kay Falle ang isang granada at itim na sling bag.
Kasalukuyan nang nasa kustodiya ng Cabuyao CPS ang mga suspek at nakatakdang sampahan ng kasong paglabag sa RA 10591 o Comprehensive Firearms and Ammunition Regulation Act.
Pahayag ni P/Col. Silvio, “Makaaasa po kayo na mas paiigtingin pa po ng Laguna PNP ang mga operasyon sa loose firearms dahil maaaring kumitil o bumawi ng buhay ng isang tao at maaring gamitin sa iba pang krimen.” (BOY PALATINO)
