Bea nagbagi ng blessings

RATED R
ni Rommel Gonzales

HINDI nakapagtatakang inuulan ng biyaya si Bea Alonzo, marunong kasi siyang mag-share ng blessings.

Tulad na lamang kamakailan na naging guest siya sa Eat Bulaga! at naglaro sa Bawal Judgmental portion ng noontime program.

Sa halip na iuwi ang napanalunang P50K nitong Sabago ay ibinigay ni Bea ang pera sa apat na taong kasali bilang pagpipilian na tamang sagot sa naturang segment.

Apat na ulila na sa magulang ang choices na nakaharap ni Bea sa Bawal Judgmental at isa-isa niyang napakinggan ang mga nakaaantig na kuwento ng mga ito.

Sa first round, kinailangang hulaan ni Bea kung sino sa apat na choices ang ulilang lubos sa edad na 14 o mas bata pa.

Tama naman ang naging hula ni Bea kaya’t hindi nabawasan ang kanyang guaranteed money na P50K.

Naantig ang damdamin ng Start-Up PH actress sa mga narinig niyang kuwento mula sa apat na choices.

“Maraming-maraming salamat dahil pinag-guest niyo ako rito at narinig ko ‘yung mga istorya nila at grabe ang bigat.

“Pero I have to say very inspiring din kasi sa kabila ng lahat ng mga pinagdaanan niyo, napakatapang at napaka-strong niyo na mga tao at kitang-kita ko pa rin sa mga mata niyo ‘yung kindness kahit ang dami nang challenges sa buhay niyo.”

At dahil dito ay nagdesisyon si Bea na ibigay sa apat ang kanyang prize money.

“Dahil diyan gusto ko ring i-share ‘to sa inyo, para sa inyo ‘to hindi ito para sa akin,” ani Bea.