Pagpaparinig ni Vice Ganda para nga ba kay Zephanie?

MA at PA
ni Rommel Placente

MUKHANG pinaringgan ni Vice Ganda ang singer na si Zephanie Dimaranan, huh!

Nag-guest kasi ang komedyante sa Grand Finals ng Idol Philippines Season 2 noong Linggo para sa promo ng pagbabalik ng dati niyang game show sa ABS-CBN na Everybody Sing. 

After ng kanyang dance number, ininterbyu siya ng host ng show na si Robi Domingo. HIningan siya nito ng mensahe para sa bagong tatanghaling Grand Idol Winner. Ang sabi ni Vice, “Sana maraming magbukas na opportunity sa ‘yo. Sana mag-stay ka muna sa network na ‘to.” 

Pagkasabi niyon ay tumawa si Vice. At si Robi at ang mga hurado sa Idol Philippines na sina Gary Valenciano, Moira, Chito Miranda, at Regine Velasquez ay natawa rin. Aware siguro sila na may pinariringgan si Vice at ito  nga si Zephanie. 

Si Zephanie kasi ang kauna-unahang itinanghal na Grand Idol Winner sa Idol Philippines Season 1 noong 2019. Bahagi ng napanalunan niya ay ang pagiging recording artist ng Star Music. Pero ayun at lumipat siya sa GMA 7 at bahagi na siya ngayon ng All Out Sundays.