HATAW! D'yaryo ng Bayan hatawtabloid.com
SUGATAN ang isang kabayo nang mabangga ng bus ang kalesang hila-hila nito nitong Sabado ng umaga, 3 Setyembre, sa lungsod ng Laoag, lalawigan ng Ilocos Norte.
Batay sa kuha ng CCTV, nahagip ng bus ang kalesa habang papunta sa parehong direksiyon saka natumba ang kabayo at tumama sa nakaparadang tricycle.
Ayon sa nagbahagi ng video na si VA Jan Carlo, tumigil ang bus at kinausap ng konduktor ang mga nasangkot sa insidente.
Bagaman hindi nasaktan ang kutsero ng kalesa, nabatid na sugatan ang natumbang kabayo.
Pahayag ng Laoag City Traffic Division, hindi naiparating sa kanila ang insidente at maaaring nagkaareglohan ang mga sangkot dito.
Samantala, pinatawan ng kompanya ng bus ang kanilang driver ng preventive suspension dahil sa naganap na insidente.
