HATAW! D'yaryo ng Bayan hatawtabloid.com
ARESTADO ang pinaniniwalaang mga tulak ng ilegal na droga na nasamsaman ng P60,000 halaga ng shabu sa ikinasang anti-illegal drugs buy bust operation ng mga awtoridad sa lungsod ng San Pablo, lalawigan ng Laguna, nitong Miyerkoles, 24 Agosto.
Kinilala ni P/Col. Randy Glenn Silvio ang mga suspek na sina Arvin Trinidad, 40 anyos, walang trabaho; at kanyang kinakasamang si Teresa Vicente, 40 anyos, vendor, kapwa mga residente ng Israel Village, Brgy. San Antonio 1, sa naturang lungsod.
Sa nasabing buy bust operation ng San Pablo CPS sa koordinasyon ng Philippine Drugs Enforcement Agency (PDEA) PRO4A, nadakip ang mga suspek dalong 5:59 pm kamakalawa sa kanilang bahay.
Nakompiska mula sa mga suspek ang isang maliit na plastic sachet at isang medium size na plastic sachet na naglalaman ng hinihinalang shabu na may timbang na limang gramo at tinatayang nagkakahalaga ng P60,000; at pouch na may lamang P500.
Kasalukuyang nasa kustodiya ng San Pablo CPS ang mga naarestong suspek at nakatakdang sampahan ng kasong paglabag sa RA 9165 o Comprehensive Dangerous Drug Act of 2002.
Isusumite ang mga nasamsam na ebidensiya sa Provincial Forensic Unit sa Camp Paciano Rizal, Sta. Cruz , Laguna para sa laboratory at drug test examinations. (BOY PALATINO)
