Suspek sa pagpatay sa dalagitang biker kinilala na

SA pagpapatuloy ng imbestigasyon sa pagpatay sa dalagitang biker na si Princess Marie Dumantay, 15 anyos, Grade 9 student ng Grace Ville National High School at residente ng Block 19 Lot 32 Phase 6A Grace Ville, Tower Ville, sa lungsod ng San Jose del Monte, lalawigan ng Bulacan, nagkaroon na ng lead ang mga awtoridad sa kaso nitong Miyerkoles, 17 Agosto.

Natagpuan ang bangkay ni Princess Marie na nakadapa sa masukal na damuhan sa Bypass Road, Brgy. Bonga Menor, Bustos, Bulacan nitong 12 Agosto.

Sa pag-usad ng imbestigasyon, nakipag-ugnayan ang mga tauhan ng Bustos MPS sa pamumuno ni P/Maj. Leopoldo Estorque sa Quezon City Police District upang matukoy ang kinaroroonan ng isang Jose Francisco Santos na sinasabing huling nakitang kasama ng biktima bago nawala.

Nakipag-usap ang grupo kay Jomer Maneja, ang nakarehistrong may-ari ng Toyota Wigo na may plakang EAE 2913 na sinakyan ni Jose Francisco Santos at ayon sa kanyang sinumpaang salaysay na notaryado ni Atty. Michael Marpuri, sinabi niyang ang naturang sasakyan ay wala na sa kanyang pag-aari simula Agosto 2021 at nakipagkasundo sa kanyang nakatatandang kapatid na si Gaspar Maneja dahil hindi na niya kayang hulugan ang financing monthly amortization nito.

Sa pagpapatuloy ng imbestigasyon, napag-alamang si Gaspar Maneja ay si Jose Francisco Santos rin at may nakabimbing mga kaso sa hukuman.

Sinampahan na ng kasong Rape (RA 8353) with Homicide at Presidential Decree No.83 (Using Fictitious Name and Concealing True Name) Article 178 of RPC sa Office of the Provincial Prosecutors sa Malolos City, Bulacan sa ilalim ni Senior Assistant Provincial Prosecutor Catherine E. Rutor Reyes. (MICKA BAUTISTA)