HATAW! D'yaryo ng Bayan hatawtabloid.com
PATAY ang tatlo katao kabilang ang batang 5-anyos nang paulanan ng bala ang kanilang bahay nitong hatinggabi ng Martes, 2 Agosto, sa bayan ng Mamasapano, lalawigan ng Maguindanao.
Ayon kay P/Maj. Maximiano Gerodias, hepe ng Mamasapano MPS, pinagbabaril ng hindi tukoy na bilang ng mga armadong lalaki ang bahay ng biktimang kinilalang si Abdulkadir Matuwa, 53 anyos, magsasaka, at residente sa Sitio Pamalian, Brgy. Mangungkaling, sa nabanggit na bayan.
Binawian ng buhay sa insidente si Abdulkadir, asawa niyang si Zahera, 32 anyos, at ang 5-anyos na anak nilang si Nhala, habang nakaligats ang kanilang 9-buwang gulang, sanggol na anak.
Ani Gerodias, natutulog ang sanggol sa duyan nang maganap ang masaker.
Kasalukuyan nang nasa pangangalaga ng kanilang kaanak ang nakaligtas na sanggol.
Narekober ng pulisya ang hindi pa tukoy na bilang ng mga basyo ng bala ng Armalite rifle.
Patuloy ang isinasagawang imbestigasyon ng mga awtoridad upang matukoy ang motibo ng pag-atake at pagkakakilanlan ng mga suspek.
