Allen naiyak sa Hall of Fame award ng FAMAS

MA at PA
ni Rommel Placente

SA katatapos lang na FAMAS Awards Night 2022 ay tumanggap ng Hall of Fame award si Allen Dizon sa kategoryang Best Actor. Limang Best Actor trophy na kasi ang napanalunan niya mula sa oldest award-gving body.

Una siyang itinanghal na Best Actor sa FAMAS noong 2009 para sa pelikulang Paupahan. Sumunod ay noong 2009 para naman sa Dukot. Ang ikatlo ay noong 2015 para sa Bomba. Ikaapat ay sa pelikulang Magkakabaungnoong 2015 at ang huli ay sa Latay noong 2021.

O, ‘di ba bongga si Allen?

Bahagi ng acceptance speech ni Allen sa awards night noong Sabado, July 30, 2022, “Simple lang po ang pangarap ko noong nagsisimula pa lang ako sa showbiz, ang maging artista para makatulong sa pamilya ko.

“Eleven years old po kasi ako noong namatay ang father ko at nakita ko ang hirap ng mother ko being a single mother of four.

“Ngayon, nailagay ako sa Hall of Fame for Best Actor kahilera ang mga bigating artista na tinitingala sa industriya kagaya nina FPJ, Eddie Garcia, Christopher de Leon, President Erap, pati na rin si Ms. Charito Solis, Vilma Santos, at National Artist Nora Aunor.

“Para akong nasa alapaap, sobrang saya. Nakaiiyak po.

“Pero hindi ibig sabihin nito ay makakampante ako, kundi lalo ko po pagbubutihin ang pag-arte at ipagpapatuloy ang paggawa ng makabuluhang pelikula.”