Caretaker ng farm todas sa pamamaril

Binawian ng buhay ang isang lalaki matapos pagbabarilin sa harap ng kanyang bahay sa bayan ng Cavinti, lalawigan ng Laguna nitonf Martes ng gabi, 14 Hunyo.

Nabatid na dakong 8:30 ng gabi nang makatanggap ng impormasyon ang Cavinti MPS sa pamamagitan ng tawag sa telepono mula sa isang concerned citizen tungkol sa insidente.

Agad rumesponde ang mga tauhan ng Cavinti MPS sa pangunguna ni P/Maj. Ramises De Castro sa nasabing lugar upang iberepika ang katotohanan ng ulat.

Lumabas sa inisyal na imbestigasyon na dumating ang hindi kilalang suspek na nakasuot ng kulay abong jacket na may hood, sakay ng motorsiklong itim bilang getaway vehicle sa harap ng bahay ng biktimang kinilalang si Zacarias Sorongon, 67 anyos, balo, caretaker ng isang farm at dating Philippine Army (AWOL).

Tinawag umano ng suspek ang biktima at nagpanggap na may itatanong ngunit nang lumabas si Sorongon, bigla siyang binaril ng suspek gamit ang hindi mabatid na kalibre ng baril.

Tinamaan ng bala ng baril ang biktima sa iba’t ibang bahagi ng kanyang katawan na nagresulta sa kanyang agarang kamatayan.

Matapos ang insidente, tumakas ang suspek patungo sa direksyon ng Luisiana, Laguna gamit ang kanyang getaway vehicle.

Agad na ipinagbigay alam sa malapit na estasyon ng pulis ang insidente para sa isang dragnet operation habang humiling ang SOCO na payagan silang mag-occular processing sa pnangyarihan ng krimen.

Patuloy pa rin ang isinanasagawang imbestigasyon ng kapulisan upang matukoy ang pagkakakilanlan ng suspek at motibo sa likod ng pamamaslang. (BOY PALATINO)