Bilibid  ililipat sa Tanay, JVA housing project bubuwagin – DENR

INIIMBESTIGAHAN ng Department of Environment and Natural Resources (DENR) ang JVA Housing Project sa lupang inilaan ng lokal na pamahalaan upang paglipatan ng New Bilibid Prison at Regional Office ng DENR sa bayan ng Tanay, lalawigan ng Rizal.

Ayon sa kagawaran, ang nabanggit na lupa ay bahagi ng Lot 10 na nakapangalan sa Republika ng Pilipinas at may lawak na 300 ektarya na ang 270 ay nakalaan sa NBP at ang 30 ektarya ay tatayuan ng Regional Office ng DENR – Calabarzon.

Nabatid, nakapaloob sa isang joint venture agreement (JVA) sa pagitan ng DENR at Blue Star Development Corporation na ngayon ay kilala sa pangalang Garden Cottages, Masungi Georeserve Foundation.

Ayon kay Ramil Limpiada, Provincial Environment and Natural Resources (PENRO), mayroong binuong investigating body ang kagawaran.

Direkta umano itong pinamunuan ni Usec. Ernesto Adobo para rebisahin ang JVA kabilang ang Assistant Secretary para sa legal biodiversity management at iba pang miyembro ng komite.

Aniya, ang pagkakadeklara sa lupain na paglilipatan ng New Bilibid Prison (NBP) at DENR-Regional Office ay sa bisa ng Proclamation 1158 ni dating Pangulong Gloria Macapagal Arroyo noong 8 Setyembte 2006.

Dagdag ni Limpiada, ito ay nakapaloob sa JVA noong panahon ni Sec. Heherson Alvarez.

Malinaw rin umano na ang orihinal na laman ng JVA ay ang kabuuang Proclamation 776 na inisyu noong 2 April  1996 na naglalaan ng pabahay sa mga empleyado ng DENR, DILG, DND, DECS at DoTC.

Sa parehong petsa, inamyendahan ng Proclamation 564 ang Proclamation 776 na isinama bilang benepisaryo ng pabahay ang mga empleyado ng Office of the President (OP) at Presidential Management Staff (PMS).

Sa huli, lumilitaw na ang kabuuan ng JVA na 130 ektarya at Lot 10 na 300 ektarya ay kasama ang buong PD 324 at nakapaloob sa MOA noon ni Gina Lopez at ng Masungi Georeserve Foundation, dating Blue Star at Garden Cottages na may kabuuan o lawak na 2,700 ektarya at pilit pa ring sinasakop ang ilang bahagi ng Certificate of Ancestral Domain Title (CADT). (EDWIN MORENO)