HATAW! D'yaryo ng Bayan hatawtabloid.com
ARESTADO ang nakatalang most wanted person (MWP) ng CALABARZON PNP sa kasong rape at sexual assault sa ikinasang manhunt operation ng Sta. Rosa CPS nitong Miyerkoles, 8 Hunyo sa lalawigan ng Laguna.
Kinilala ni P/Col. Cecilio Ison, Jr., ang suspek na si Jonathan Larumbi, 47 anyos, walang trabaho, at nakatira sa M.H. Del Pilar St., Cabuyao, Laguna.
Sa ulat ni P/Lt. Col. Paulito Sabulao, hepe ng Sta. Rosa CPS, dinakip ang akusado dakong 1:40 pm kamakalawa sa Brgy. Bubuyan, Calamba, sa bisa ng warrant of arrest sa mga kasong Rape at Sexual Assault na isinampa noong 11 Hulyo 2017.
Walang inirerekomendang piyansa sa kasong rape samantala P80,000 ang piyansa sa kasong sexual assault na inisyu ng Sta. Rosa City RTC Branch 101.
Kasalukuyang nasa kustodiya ng Sta. Rosa CPS ang akusado habang ang korte ay iimpormahan sa kanyang pagkaaresto.
Matagumpay na naisagawa ang operasyon sa pamamagitan ng nakalap na impormasyon mula sa Barangay Intelligence Network (BIN) ng komunidad.
Pahayag ni P/BGen. Antonio Yarra, “hindi titigil ang ating mga pulis sa pagtugis sa mga nagkasala sa batas at patuloy kaming magsasagawa ng operasyon upang mapanagot at mabigyan ng hustisya ang mga biktima.” (BOY PALATINO)
