Abandonado at kompiskado P4.6-M ‘KONTRABANDO’ ‘TINUNAW’ NG BOC-NAIA

SA PAGSISIKAP ng Bureau of Customs sa Ninoy Aquino International Airport (BoC-NAIA), na tiyaking lahat ng bodega at pasilidad sa Port of NAIA ay makapagbigay ng akomodasyon sa mga parating na importasyon, nagsagawa ang ahensiya ng kondemnasyon sa maraming abandonado at kompiskadong kargamento na tinatayang nasa P4.605 milyones ang halaga.

Kabilang dito ang iba’t ibang produkto gaya ng expired at hindi rehistradong food items, used UV lamps, ipinagbabawal na Chinese medicines, at 60 kahon ng pekeng sigarilyo tinatayang nasa P3.893 milyon ang market value.

Sa pamamgitan ng prosesong ‘pyrolysis’ sa ilalim ng superbisyon ng BoC-NAIA Auction and Cargo Disposal Division, nilusaw ang mga nasabing kontrabando.

Binigyan diin ni District Collector Carmelita M. Talusan ang kahalagahan na mapigilan ang pagpasok ng mga ipinagbabawal na produkto lalo ang mga pagkain at gamot na iniangkat nang walang kaukulang permiso.

Inilinaw din ni Collector Talusan ang kahalagahan ng pagnenegosyo at mabilis na pagre-release ng mga produkto.

Habang ang bansa ay patungo sa pagbawi mula sa perhuwisyong dulot ng pandemyang CoVid-19, sa pamamagitan ng pinasiglang pandaigdigang kalakalan, at iba pa, ang BoC-NAIA sa pamumuno ni Commissioner Rey Leonardo Guerrero, ay nananatiling dedikadong magsilbi bilang pangunahing puerto sa usapin ng pagpapadaloy ng kalakalan, koleksiyon ng buwis, at proteksiyon ng mga hangganan. (RR)