HATAW! D'yaryo ng Bayan hatawtabloid.com
INAANYAYAHAN ng Metropolitan Manila Development Authority (MMDA) ang mga Filipino artist na lumahok sa 2022 MMDA National Art Competition, isang pagkakataong maipakita ang kanilang pagkamalikhain at talento sa pamamagitan ng pagguhit at pagpipinta.
Sinabi ni MMDA Chairman Romando Artes, ang National Art Competition ay isang magandang pagkakataon para sa mga artist sa buong bansa na lumikha at magpakita ng kanilang mga gawa o sining na magbibigay inspirasyon sa iba.
Bilang bahagi ng mandato ng MMDA na pangalagaan at isulong ang kultura, hindi lang ng Metro Manila, kundi ng buong bansa.
Ayon sa MMDA Chairman, ang National Art Competition 2022 ay inilunsad para hikayatin ang mga artistang Filipino na ipakita ang kanilang mga kakayahan.
Sa pamamagitan ng patimpalak na ito, mai-immortalize ang sari-saring mayamang kultura ng ating bansa at pahalagahan sa pamamagitan ng visual arts.
Ang kompetisyon ay isang offshoot ng “I Love MM (Metro Manila)” metrowide photography, songwriting, at painting contests, na gaganapin upang i-highlight ang paglago at pag-unlad ng National Capital Region, noong Nobyembre ng nakaraang taon.
Ang Pambansang Art Competition ay bukas sa lahat ng Filipino Artist na may edad 18-35 anyos.
Ang magwawagi sa unang gantimpala ay tatanggap ng P300,000 at Scholarship para sa Art Residency Program, habang ang ikalawang premyo ay tatanggap ng P200,000 at Scholarship para sa Art Residency Program. Ang apat na finalists ay tatanggap ng P50,000 bawat isa.
Lahat ng interesadong kalahok ay dapat magsumite ng kanilang mga entry online, kasama ang notarized Registration Form at valid government-issued identification card. (GINA GARCIA)
