HATAW! D'yaryo ng Bayan hatawtabloid.com
TINAWAG ni senatorial candidate at human rights lawyer Chel Diokno na ‘pambansang chicken’ ang isang kandidato na ayaw sumipot sa mga debate.
Hindi man nagbanggit ng pangalan, tanging si Ferdinand Marcos, Jr., lang ang tanging kandidato sa pagkapangulo ang hindi humaharap sa debate.
Tumanggi si Marcos sa imbitasyon na one-on-one debate ni Vice President at kapwa presidential aspirant Leni Robredo.
“Sabi nila ‘pambansang chicken’ daw ‘yung ayaw sumipot sa debate. Pero buti pa ang chicken, sinusuri, kinikilatis, tinitimbang bago piliin at bilhin,” ani Diokno sa isang post sa Twitter.
Iginiit ni Diokno, ang debate ay magandang paraan upang sukatin at timbangin ang mga kandidato kung karapat-dapat ba silang makakuha ng boto ng taongbayan.
“Nagdaraos tayo ng mga debate para matimbang ang mga kandidato at makita kung karapat-dapat ba sila sa boto natin. Sana kung gaano tayo kapihikan sa manok na binibili sa palengke, ganoon din sa manok natin sa eleksiyon,” ani Diokno.
Sa isang hiwalay na social media post, sinabi ni Diokno, kung sa debate ay takot na ang isang kandidato sa pagkapangulo, paano pa kung naharap na siya sa mabibigat na problema ng bansa.
