Buntis na misis tumangging makipagtalik
MISTER HUBO’T HUBAD, IPINAGHAMPASAN SA SEMENTADONG KALSADA 7-ANYOS ANAK

ni EDWIN MORENO

PATAY ang 7-anyos batang lalaki nang ihataw sa sementadong kalsada ng lalaking hubo’t hubad, sinabing ama ng biktima, inilarawang tila sinaniban ng demonyo nang ipaghampasan ang sariling anak, sa Rodriguez (Montalban), Rizal kahapon.

Kinilala ni P/Lt. Col. Marcelino, Pipo Jr., hepe ng pulisya ang suspek na nadakip at ginulpi ng taong bayan na si Eraño Veraces y Salioman, 26 anyos, habang ang biktimang anak ay si Erron Veraces, 7-anyos estudyante.

Sa reklamo ng inang si Rodalyn, 25 anyos sa awtoridad, dakong 9:00 am, noong Linggo, 24 Abril, nangyari ang karumal-dumal na krimen sa Phase 1, Villa San Isidro, Brgy. San Isidro sa nasabing bayan.

Sa obserbasyon ng ilang bystander tila bangag sa alak o ilegal na droga ang suspek kaya parang sinaniban ng masamang espiritu o demonyo nang ipaghampasan ang anak sa sementadong kalsada.

Ayon sa pulisya, pinilit ng mister na makipagtalik kay misis ngunit tumanggi dahil buntis.

Kasunod nito, nagulat ang buong komunidad nang makitang ipinaghahampasan ng ama ang sariling anak sa sementadong kalsada.

Naisugod ang biktima sa medical clinic ngunit inilipat ito sa Ynares Hospital dahil sa mga grabeng pinsala ngunit binawian ng buhay.

Bugbog sarado ang suspek sa gulpi ng taongbayan bago isinuko sa awtoridad at natakdang sampahan ng kasong Parricide.