HATAW! D'yaryo ng Bayan hatawtabloid.com
IPINAPAKITA ng pananalanta ni Tropical Storm “Agaton” sa ilang bahagi ng bansa na kailangan nang magtayo ng permanente at ligtas na evacuation centers para sa mga nakatira sa disaster-prone areas, ayon kay senatorial candidate Gen. Guillermo Lorenzo Eleazar.
Ayon kay Eleazar, maraming Filipino ang nangingiming magtungo sa evacuation centers dahil kadalasan ay siksikan, at bago ang pandemya, ang mga classroom ang ginagamit kahit may isinasagawang klase.
“Ito ang minsang dahilan kung bakit mas pinipili ng iba nating kababayan na manatili sa bahay kahit alam nilang delikado iyon. Kung magkakaroon tayo ng matibay at ligtas na permanent evacuation centers, tiwala ako na mas magiging epektibo ang mga preemptive evacuation ng ating mga lokal na pamahalaan,” ani Eleazar.
“Local government units should no longer use school facilities as evacuation sites. Dapat paglaanan ang pagtatayo ng evacuation centers para mabigyan naman ng dignidad ang ating mga kababayan dahil wala namang may gusto na manatili sa evacuation centers kung hindi naman talaga kailangan,” aniya.
Kapag nahalal bilang senador, balak ni Eleazar na isulong ang pagtatayo ng permanenteng evacuation centers dahil ang ganitong programa ay nakabinbin pa sa Mataas na Kapulungan. Dati nang inaprobahan ng House of Representatives, o Mababang Kapulungan, ang panukalang batas para sa permanenteng evacuation centers.
Ayon kay Eleazar, sa permanenteng evacuation centers ay kailangang tiyak na may pagkain at inuming tubig na sasagutin ng pamahalaan o local government units habang may nakikisilong na evacuees.
Mas lalong kailangan ang mga ganoong pasilidad dahil madalas tamaan ng malalakas na bagyo ang Filipinas, aniya.
Mas maraming buhay ang masasagip kung rerepasohin at ia-adjust ang disaster response measures ng pamahalaan at local government units.
Sinalanta ng bagyong Agaton ang ilang lalawigan sa Visayas noong nakaraang linggo at kumitil ng mahigit 100 buhay.
Nagpapatuloy ang search and retrieval operation para sa dose-dosena pang nawawala. (ALMAR DANGUILAN)
