HATAW! D'yaryo ng Bayan hatawtabloid.com
INIULAT ni Laguna PPO Acting Provincial Director P/Col. Cecilio Ison, Jr., kay CALABARZON PNP Regional Director, P/BGen. Antonio Yarra, ang pagkakadakip sa pampitong most wanted person (MWP) ng lalawigan sa ikinasang joint operation ng mga awtoridad sa lungsod ng Biñan.
Sa kanyang ulat, nasakote ng Biñan CPS sa ilalim ng direktang pangangasiwa ni P/Lt. Col. Jerry Corpuz, katuwang ang Regional Intelligence Division (RID) 4A – Regional Intelligence Team (RIT) Laguna/Rizal, ang suspek na kinilalang si Richard Gomez, 33 anyos, lalaki, may asawa, at residente ng Brgy. Langkiwa, sa nabanggit na lungsod.
Isinagawa ang operasyon sa bisa ng warrant of arrest na inilabas ng Valenzuela RTC Branch 171 para sa paglabag sa RA 6539 o Anti-Carnapping Act of 1972 na may inirekomendang piyansang P300,000.
Kasalukuyang nasa kustodiya ng Biñan CPS si Gomez habang ipinagbibigay-alam ang pag-aresto sa court of origin.
Pahayag ni P/Col. Ison, “Pinupuri ko ang ating mga tauhan sa Biñan CPS para sa tagumpay na ito. Pipilitin namin ang mga operasyong ito upang matiyak na walang mga wanted na gumagala sa paligid.” (BOY PALATINO)
