MWP ng Laguna PNP arestado sa Victoria

NADAKIP ang ikapitong most wanted person (MWP) ng Laguna PPO sa ikinasang joint manhunt operation ng mga awtoridad sa bayan ng Victoria, sa naturang lalawigan.

Sa ulat ni Laguna PPO Director, P/Col. Rogarth Campo kay CALABARZON Regional Director, P/BGen. Antonio Yarra, inaresto ng Victoria MPS, sa ilalim ng direktang pangangasiwa ng kanilang hepeng si P/Capt. Laudemer Abang, at Regional Mobile Force Battalion (RMFB) 4A, 402nd Maneuver Company, ang suspek ay kinilalang si Markie Romar Culubong, 35 anyos, walang trabaho, residente sa Brgy. San Benito, sa naturang bayan, sa bisa ng alias warrant of arrest na inisyu noong 17 Marso 2014, ng Calamba City RTC Branch 35, para sa kasong rape na walang inirekomendang piyansa.

Pansamantalang nakapiit ang akusado sa Victoria MPS jail habang ipinababatid ito sa pinanggalingang hukuman.

Pahayag ni P/Col. Campo, “Ang aming mga operasyon laban sa mga wanted na tao ay hindi kailanman nasamsam. Higit pa natin paiigtingin ang mga operasyong ito upang matiyak na walang mga warrant of arrest na mai-archive.” (BOY PALATINO)