HATAW! D'yaryo ng Bayan hatawtabloid.com
SUGATAN ang isang tumatakbong alkalde ng bayan ng Calamba, sa lalawigan ng Misamis Occidental, matapos barilin ng hindi kilalang suspek nitong Linggo ng umaga, 13 Marso.
Kinilala ang biktimang si George Matunog, Jr., 55 anyos, kandidato sa pagkaalkalde ng bayan ng Calamba, sa nabanggit na lalawigan.
Ayon kay P/Col. Anthony Placido, provincial director ng Misamis Occidental PNP, kalalabas ni Matunog mula sa isang convenience store at naglalakad pauwi sa kaniyang bahay sa Purok 1, Brgy. Southwestern Poblacion, sa naturang bayan, nang hintuan siya ng isang motosiklo saka binaril ng nakaangkas na suspek na nakasuot ng dilaw na jacket.
Tinamaan sa batok ang biktima saka lumabas ang bala ng baril sa kaniyang kanang pisngi.
Ayon kay P/Lt. Richmond Itcay, hepe ng Calamba MPS, maayos na ang kondisyon ng biktima na nasa isang pagamutan sa lungsod ng Ozamiz.
Patuloy na nag-iimbestiga ang pulisya upang matukoy ang kalibre ng ginamit na baril ng gunman at ang kanilang pagkakakilanlan.
