HATAW! D'yaryo ng Bayan hatawtabloid.com
SA IKALAWANG pagkakataon, mulang naaresto ang “Pilipinas Got Talent” Season 6 third runner-up na si Mark Joven “Vape Lord” Olvido sa ikinasang drug buy bust operation ng mga awtoridad sa bayan ng Sta. Cruz, lalawigan ng Laguna, nitong Biyernes ng gabi, 18 Pebrero.
Sa ulat ng Laguna PPO, dinakip si Olvido, 35 anyos, isang tricycle driver, sa Sitio Maunawain, Brgy. Duhat, sa nabanggit na bayan pasado 10:00 pm.
Nasamsam ng mga pulis mula sa suspek ang limang sachet ng hinihinalang shabu, may timbang na 12.5 gramo at tinatayang nagkakahalaga ng P85,000; at P500 marked money.
Matatandaan, noong Mayo 2021, nauna nang nadakip si Olvido dahil sa pagbebenta ng ilegal na droga at nakalaya dahil sa plea bargaining agreement.
Nakilala si Olvido matapos maging isa sa mga finalists ng “Pilipinas Got Talent” noong 2018 at naging bahagi ng teleseryeng “Ang Probinsyano.”
