Mangingisdang rapist timbog sa manhunt

NADAKIP ng mga awtoridad ang naitalang no. 10 most wanted person ng CALABARZON PNP sa ikinasang joint manhunt operation sa bayan ng Sablayan, lalawigan ng Occidental Mindoro, nitong Biyernes ng hapon, 18 Pebrero.

Iniulat ni Laguna PPO acting Provincial Director P/Col. Rogarth Campo kay PRO4-A PNP Regional Director P/BGen. Antonio Yarra, ang pagkakaaresto sa suspek na kinilalang si Charlie Mejino, alyas Jollibee, 29 anyos, mangingisda, sa kaniyang tahanan sa Brgy. Buenavista sa nabanggit na bayan.

Isinagawa ang operasyon ng Mabitac MPS at Sablayan MPS sa ilalim ng direktang pangangasiwa ni P/Capt. Rolly Dahug sa bisa ng warrant of arrest sa krimeng panggagahasa kaugnay ng RA 7610 (Special Protection Against Child Abuse, Exploitation and Discrimination), may petsang 29 Mayo 2013, inisyu sa Regional Trial Court Branch 33, Siniloan, Laguna.

Pansamantalang nasa kustodiya ng Mabitac MPS ang akusado habang aabisohan ang court of origin sa pagkakaaresto sa wanted person.

Pahayag ni P/Col. Campo, “Patuloy nating paiigtingin ang ating mga operasyon laban sa wanted persons sa loob o labas ng lalawigan upang matiyak na walang mga kriminal na malayang gumagala at makapagdulot ng higit na pinsala sa mga mamamayan.” (BOY PALATINO)