HATAW! D'yaryo ng Bayan hatawtabloid.com
MATAPOS tanggalin sa kanilang slate ang dalawang senatoriables, hindi muna ikakampanya ng tambalang Lacson-Sotto sina senatorial candidates Richard Gordon at dating Vice President Jejomar “Jojo” Binay.
Ayon kay vice presidential candidate Vicente “Tito” Sotto III, sa ngayon ay 11 senador lamang ang iniendoso ng kanilang tambalan.
Tiniyak ni Sotto, mag-uusap sila ni presidential aspirant Senator Panfilo “Ping” Lacson para punuan ang kanilang 12 senatorial candidates.
Tinukoy ni Sotto, hanggang sa kasalukuyan ay walang nagaganap na usapan sa pagitan ng kampo ng tambalang Lacson-Sotto sa kampo ni Binay.
Samantala, si Gordon, simula noong kick-off rally at unang araw ng pormal na pangangampanya hanggang sa kasalukuyan ay madalas dumadalo sa entabldo ng tambalang Leni-Kiko, at ang pinakahuli ay ang rally sa Quezon City.
Magugunitang nauna na rin umugong ang balitang inendoso ni Gordon ang tambalang Leni-Kiko sa kanyang pagdalo sa rally ng dalawa sa Bicol.
Ngunit matapos ang masusing imbestigasyon, sinabi ni Lacson, walang endoso na naganap sa bahagi ni Gordon.
Ngunit matapos ito, nagbanta sina Lacson at Sotto na mayroon silang hangganan sa lahat ng bagay lalo sa kanilang mga rally na pinayapagan nilang magpadala ng kinatawan at video clip ngunit sa ibang entablado ay laging naroon.
Para sa tambalang Lacson-Sotto, obvious na hindi tama iyon bagamat aminado ang dalawa na nais nilang manalo ang lahat ng tumatakbong senador sa kanilang tambalan.
Ngunit hindi mawawala sa senatorial lineup ng tambalang Lacson-Sotto, si reelectionist Senator Joel “Tesdaman” Villanueva.
Pinasasalamatan ito ni Villanueva kasunod ang pahayag na isang malaking karangalan para sa kanya ang maging bahagi ng kanilang grupo.
Sinabi ni Villanueva, nakatrabaho niya ang tambalang Lacson-Sotto sa senado at natitiyak naman niyang nakita ng dalawa ang kanyang trabaho.
Nagpapasalamat si Sotto kay Parañaque Mayor Edwin Olivarez sa mainit na pagtanggap sa kanya sampu ng konseho nito at mga opsiyal at empleyado ng lungsod.
Paglilinaw ni Olivarez, bagamat mayroong ineendosong bise presidente ang PDP-Laban, kung saan siya kabilang, hindi naman niya iimpluwensiyahan ang mga opisyal at kandidato ng lungsod.
Sinabi ni Olivarez, may kanya-kanya silang mga partido at kanyang irerespeto ang pananaw ng bawat isa at welcome ang sinoman sa kanilang lungsod.
Sa kasalukuyan, kabilang sa senatorial lineup ng tambalang Lacson-Sotto bukod kay Villanueva ay sina dating congressman Monsour del Rosario, Dr. Minguita Padilla, dating PNP chief, Gen. Guillermo Eleazar, dating Agriculture Secretary Manny Piñol, ang nagbabalik na si Senador JV Ejercito, reelectionist Senate Majority Leader Juan Miguel Zubiri, Sorsogon Gov. Francis “Chiz” Escudero, Antique Rep. Loren Legarda.
Naninidigan sina Lacson at Sotto, ahat ng kanilang iniendosong senador ay mananatili sa kanilang linyada basta sumunod sa gentlemen’s agreement at walang eendosong ibang tambalan. (NIÑO ACLAN)
