HATAW! D'yaryo ng Bayan hatawtabloid.com
NAGHANDA ang Las Piñas City government ng isang Safari at Toy Carnival-inspired themes sa kanilang vaccination sites para sa pagtuturok ng bakuna kontra CoVid-19 sa mga batang edad 5-11 anyos sa lungsod, kahapon Martes, 8 Pebrero 2022.
Inihayag ni Mayor Imelda Aguilar, ang vaccination site sa SM Center ay naghanda ng Safari-inspired theme habang Toy carnival theme naman ang inilatag sa The Tent upang pagaanin ang kalooban ng mga bata habang naghihintay silang mabakunahan.
Ayon kay Mayor Aguilar, magkakaroon ng film showing para sa mga bata upang malaman nila ang kahalagahan ng pagpapabakuna laban sa CoVid-19.
Bukod sa film showing ukol sa kahalagahan ng pagpapabakuna, sinabi ni Aguilar, naghanda rin sila ng cartoons show para hindi mainip ang mga bata. Idinugtong ng alkalde, ang Las Piñas City government ay magkakaloob ng coloring materials at bags of candies sa mga magpapabakunang bata sa SM Center habang mga lobo/balloons at cotton candies ang ipamamahagi naman sa The Tent.
Aniya, target ng lokal na pamahalaan na mabakunahan ang 1,500 hanggang 2,000 na mga bata bawat araw. (EJ DREW)
