P915-M gastos sa ads pinabulaanan ni Ping

“IMPOSIBLENG gumastos kami ng halagang wala naman sa amin.”

Ito ang tahasang sinabi ni presidential aspirant Senator Panfilo “Ping” Lacson kasunod ang lumabas na ulat na gumastos sila ng P915 milyon sa kanyang ads.

Ayon kay Lacson, ang naturang ulat ay mariin niyang pinabubulaanan lalo na’t ang halaga ay hindi naiisip kung saan sila kukuha.

“I asked my campaign team, volunteers and supporters about this. They insisted that they never saw, much less had this much money. No way we could have spent what we didn’t have. I asked them to check again – same answer,” ani Lacson.

Batay sa ulat ng Philippine Center for Investigative Journalism (PCIJ) umaabot sa P915 milyon ang halagang nagastos ni Lacson sa kanyang media ads noong 2021.

Ayon sa PCIJ, ang mga numero na kanilang iniulat ay base sa halaga na nakasaad sa published rate cards bago pa man bigyan ng diskuwento ang campaign team ni Lacson. (NIÑO ACLAN)