Ina nagpapataya ng jueteng
2-ANYOS PASLIT PATAY SA PINAGLARUANG LIGHTER NG 2 UTOL

ISANG 2-taong gulang na batang babae ang namatay nang masunog ang kanilang bahay dahil sa pinaglaruang lighter nitong Lunes ng umaga, 17 Enero, sa lungsod ng Anipolo, lalawigan ng Rizal.

Kinilala ni Fire S/Insp. Wennie Astrero, ground commander, ang namatay na biktimang si Vanessa Glee, 2 anyos, nakatira sa Chico St., Purok Sumulong, Brgy. dela Paz, sa lungsod. 

Sa imbestigasyon ni SFO1 Jayar Viduya, Fire Arson Investigator, dakong 9:19 am kamakalawa nang sumiklab ang sunog habang nasa loob ng bahay ang magkakapatid sa nabanggit na lugar.

Pahayag ng ama ng biktima na si Rolindo Glee, iniwan ng kanyang misis ang magkakapatid habang nagpapataya ng jueteng sa kanilang lugar. 

Agad nasagip ng mga kapitbahay ang mga kapatid ng biktima na may edad 7 anyos at 5 anyos ngunit hindi nasagip ang paslit sa pag-aakalang kasama ng ina sa pagpapataya. 

Dakong 10:03 am nang ideklarang naapula na ang sunog, at noon din nakita ang labi ni Vanessa sa natupok na bahay. 

Hindi na binanggit ni Viduya ang pangalan ng dalawang batang nakaligtas dahil sa trauma na dinaranas ngayon ng magkapatid.

Aabot sa P90,000 ang halaga ng pinsala ng nasabing sunog. (EDWIN MORENO)