HATAW! D'yaryo ng Bayan hatawtabloid.com
TINAPOS ng isang alagad ng batas ang kanyang sariling buhay matapos barilin ang kanyang misis at 3-anyos anak sa kainitan ng pagtatalo ng mag-asawa sa loob ng kanilang bahay sa bayan ng Virac, lalawigan ng Catanduanes, nitong Sabado ng umaga, 15 Enero.
Itinago ni P/Maj. Malu Calubaquib, tagapagsalita ng PRO-5 PNP, ang suspek sa alyas na Jay, 25 anyos, aktibong miyembro ng Philippine National Police (PNP), na bumaril sa kanyang asawang itinago sa alyas na Joy, 28 anyos, gamit ang kanyang 9mm service pistol.
Tinamaan din ng bala ng baril ang kanilang 3-anyos anak na karga ng kanyang ina habang sila ay nagtatalo.
Matapos ito, itinututok ng ama ang baril sa kanyang ulo saka pinaputok.
Isinalaysay ni Calubaquib, naganap ang insidente dakong 1:00 am kamakalawa, kauuwi ng pulis mula sa inuman.
Nabatid na buhay pa ang bata nang datnan ng mga nagrespondeng pulis na agad dinala sa ospital ngunit idineklarang dead on arrival.
Lumabas sa paunang imbestigasyon, selos ang dahilan ng pagtatalo ng mag-asawa.
Dinala ang mga labi ng tatlo na napag-alamang pawang may mga tama ng bala ng baril sa kanilang mga ulo sa Virac Rural Health Unit para isailalim sa awtopsiya.
