HATAW! D'yaryo ng Bayan hatawtabloid.com
BINAWIAN ng buhay ang isang dalagita nang atakehin sa puso dahil sa takot habang ginigiba ng demolation team at mga armadong tauhan ng Rizal PNP ang kanilang bahay nitong Sabado, 27 Nobyembre, sa lungsod ng Antipolo, lalawigan ng Rizal.
Kinilala ang pumanaw na biktimang si Mica Antoinette Ferrer, 14 anyos, nakatira sa V. V. Soliven, Open Space, Brgy. Mayamot, sa nabanggit na lungsod.
Nabatid na dakong 3:00 pm kamakalawa nang wasakin ng demolition team ang bahay ng 100 pamilya kasama ang mga armadong pulis at assault team sa pangunguna ni Rizal PNP Provincial Director P/Col. Dominic Baccay.
Ayon sa pamilya, hindi nakayanan ng bata ang takot sa nakitang mahahabang baril at mga miyembro ng demolition team habang winawasak ang kanilang tanahan.
Hiniling din ng pamilya ang presensiya ng National Bureau of Investigation (NBI) para sa katarungan sa kamatayan ng biktima.
Kasalukuyang nananatili ang 100 pamilyang apektado ng demolisyon sa isang covered court.
Nakaburol ang biktimang 14-anyos dalagita sa giniba nilang bahay sa nabanggit na lugar.
(EDWIN MORENO)
