HATAW! D'yaryo ng Bayan hatawtabloid.com
ARESTADO ang dalawang hinihinalang tulak ng ilegal na droga sa ikinasang anti-drug operation ng mga awtoridad nang makompiskahan ng P1-milyong halaga ng hinihinalang shabu, nitong Lunes ng gabi, 8 Nobyembre, sa lungsod ng Marikina.
Sa ulat na tinanggap ni P/BGen. Orlando Yebra, direktor ng Eastern Police District, kinilala ang mga nadakip na sina Marlon Taggueg, 36 anyos, residente sa Gold St., Minahan Interior; at Joemark Garcia, 29 anyos, delivery driver, ng Camia St., Road 3, pawang sa Brgy. Malanday, sa lungsod.
Nabatid na dakong 7:00 pm kamakalawa nang masakote ng grupo ni P/Maj. Fernildo Castro, hepe ng Station Drug Enforcement Unit (SDEU), ang dalawa na nagtatarya ng shabu sa loob ng bahay ni Taggueg.
Nasamsam mula sa mga suspek ang tatlong transparent plastic sachet at dalawang bukas na ice bag ng hinihinalang shabu, may kabuuang timbang na 155 gramo at tinatayang nagkakahalaga ng P1,054,000, drug paraphernalia, at buy bust money.
Kasalukuyang nakapiit ang mga suspek sa detention cell ng Marikina PNP at nakatakdang kasuhan ng paglabag sa RA9165 o Comprehensive Dangerous Drugs Act of 2002. (EDWIN MORENO)
