Ex-city hall official patay sa tambang )Sa Biñan, Laguna)

BINAWIAN ng buhay ang isang retiradong opisyal ng lungsod ng Biñan, sa lalawigan ng Laguna matapos barilin ng hindi kilalang suspek noong Sabado ng tanghali, 3 Oktubre.

Kinilala ni P/Lt. Col. Giovanni Martinez, hepe ng Biñan police, ang biktimang si Virgilio Dimaranan, dating head ng city accounting office ng nabanggit na lungsod.

Ayon kay Martinez, financier at leader umano ng isang grupo sa lungsod ang biktima.

Naitakbo ng nagrespondeng rescue team ang biktima sa Ospital ng Biñan ngunit binawian din ng buhay makalipas ang ilang minuto dahil sa tama ng bala ng baril sa ulo at katawan.

Nabatid na patungo sa kanyang sasakyan sa harap ng multi-purpose hall ng South City Homes sa Brgy. Santo Tomas, sa lungsod, nang lapitan ng suspek, binaril, saka tumakas sakay ng motorsiklo.

Katatapos umanong dumalo sa meeting ng biktima kasama ang mga opisyal ng Biñan at ilang lokal na kandidato nang maganap ang insidente.

Tinitingnan kung may kaugnayan ang krimen sa pagpatay sa isa pang opisyal ng Biñan noong Oktubre ng nakaraang taon.