HATAW! D'yaryo ng Bayan hatawtabloid.com
Arestado ang dalawang manager habang 11 babae ang nasagip mula sa dalawang spa na nag-aalok ng “extra service” nang salakayin ng mga awtoridad sa lungsod ng Antipolo, lalawigan ng Rizal, nitong Biyernes, 17 Setyembre.
Ayon sa ulat ng Antipolo city police, sinalakay ang Nitzi Touch Massage at Miyoto Spa na parehong matatagpuan sa Sumulong Highway, Brgy. Mayamot, sa nabanggit na lungsod.
Nabatid, anim sa 11 babaeng nasagip mula sa prostitusyon ay taga-Quezon City, Maynila, at Pasig; habang ang lima ay mula sa Antipolo.
Gimik umano ng dalawang spa ang pagmamasahe ngunit nag-aalok ng extra service o sexual service sa mga customer sa halagang P2,000.
Sasampahan ng kaukulang kaso ang dalawang spa kapag napatunayang sangkot sa pambubugaw.
Hindi pinangalanan ng mga awtoridad ang dalawang manager sa mga spa na sasampahan ng kasong paglabag sa Anti-Trafficking in Person Act of 2003 sa Department of Justice (DOJ).
Samantala, kasalukuyang nasa pangangalaga ng Camp Crame ang mga kababaihan na sumasailalim sa assessment ng social workers upang malaman kung sila ay ieendoso sa shelter o ibabalik sa kanilang mga pamilya at bibigyan ng iba pang posibleng tulong.
Sumailalim ang lima sa kanila sa physical o face-to-face inquest sa DOJ habang ang anim ay dumaan sa online inquest nitong Sabado, 18 Setyembre.
(EDWIN MORENO)
