Piolo tinupad ang pangakong ‘di iiwan ang Kapamilya

SHOWBIZ KONEK
ni Maricris Valdez Nicasio

SPEAKING of Piolo Pascual, tinupad ng Ultimate Heartthrob na hindi niya kailanman iiwan ang Kapamilya dahil pumirma uli siya ng kontrata sa ABS-CBN, ang home network niya ng maraming taon.

Isang red carpet welcome ang ibinigay kay Piolo bago ang contract signing niya sa ABS-CBN na nakasama niya sina ABS-CBN president at CEO Carlo Katigbak, COO of broadcast Cory Vidanes, group CFO Rick Tan, Dreamscape Entertainment head Deo Endrinal, at ang talent manager niyang si Lulu Romero.

Gagawa si Piolo ng dalawang programa sa ABS-CBN – ang drama series niya kasama ang bagong Kapamilya star na si Lovi Poe, at isang romantic-comedy series na pagsasamahan nilang muli ni Angelica Panganiban.

Sa higit sa 25 taon niya bilang isang Kapamilya, nakilala si Piolo para sa marami niyang talento. Pero higit siyang napalapit sa mga Kapamilya dahil sa mga pinagbidahan niyang mga serye at pelikulang naging bahagi na ng kanilang buhay at itinuturing na ngayong Pinoy classics.

Dahil sa hit shows gaya ng Mangarap Ka, Lobo, Lovers in Paris,  Noah, box-office films gaya ng Dekada ’70, Starting Over Again,  Milan, Don’t Give Up on Us at marami pang iba, lalong kuminang ang bituin ng tinaguriang “Papa P” ng industriya para maging most sought-after leading man sa bansa at isa sa pinakamagagaling na aktor ng kanyang henerasyon.