HATAW! D'yaryo ng Bayan hatawtabloid.com
HATAWAN
ni Ed de Leon
HINAMON nang lalaki sa lalaki, walang armas at walang bodyguard, anumang oras at saan man, ni Niel Arce si Undersecretary Mon Cualoping ng PCOO (Presidential Communications Operations Office) matapos insultuhin niyon ang kanyang asawang si Angel Locsin at sinabihang “walang brain cells” dahil sa pagbatikos sa paglaban sa Covid. Diretsahang ding sinabi niya na hindi kailangan ang mga politiko sa problemang iyan.
Sinabi pa ni Neil sa kanyang hamon, ”iyan ay kung matapang ka at tunay na lalaki, kung hindi naman baka may kapatid kang mas bata ok lang sa akin iyon. Hihintayin kita.”
Pero hindi naman sumagot na si Cualoping hanggang sa ngayon. Imposibleng hindi niya nakita ang hamon ni Neil dahil doon mismo sa social media account kung saan niya inilagay ang “insulto kay Angel” mismo nakapost din ang hamon ni Neil.
Tingnan natin kung matutuloy ang laban at kung ilang rounds ang itatagal.
Kasi naman eh, may mga opisyal tayo ng gobyerno na masyadong pikon na ngayon sa mga batikos sa kanila. Nauna riyan, sinigaw-sigawan ni Secretary Harry Roque ang mga doctor sa isang meeting, at ngayon idedemanda raw niya ang naglabas ng video niyon. Hindi dapat ganoon eh. Dapat mangatuwiran sila kung sa palagay nila tama sila at huwag daanin sa maling pananalita.
