Higit 8.5-M vaccine doses inihatid ng Cebu Pacific sa iba’t ibang lugar sa bansa

PATULOY ang paghahatid ng Cebu Pacific ng mga bakuna kontra CoVid-19 na umabot sa 8.5 milyong vaccine doses patungo sa 25 probinsiya simula noong Marso ng kasalukuyang taon.

Sa huling dalawang linggo, inilipad ng Cebu Pacific ang higit sa 900,000 vaccine doses patungong San Jose, Ozamiz, Dumaguete, Legazpi, Puerto Princesa, Bacolod, General Santos, Iloilo, Cagayan de Oro, Cebu, Cotabato, Davao, Roxas, Tawi-Tawi, Dipolog, at  Zamboanga.

Pinakabago ang San Jose at Ozamiz sa listahan ng mga lugar na hinahatiran ng mga bakuna.

Nakatanggap ang San Jose ng 1,755 Sinovac doses noong 24 Agosto, habang nakuha ng Ozamiz ang 100 AstraZeneca doses Huwebes, 2 Setyembre.

Naghatid din ang Cebu Pacific ng mga bakuna sa Bohol, Boracay, Butuan, Cauayan, Kalibo, Masbate, Tacloban, Tuguegarao, at Virac.

“We are one with the government’s vaccination drive to reach a sizeable number of inoculated Filipinos as soon as possible. We will continue to distribute vaccines across our widest domestic network,” pahayag ni Alex Reyes, Chief Strategy Officer ng Cebu Pacific.

Lahat ng bakuna ay naaayon sa safety standards at nakalagak sa mga temperature-specific container upang mapanatili ang bisa nito hanggang sa pagdating sa itinakdang mga vaccination sites. (KARLA OROZCO)