HATAW! D'yaryo ng Bayan hatawtabloid.com
INIHUDYAT na ng pamahalaang lungsod ng Maynila ang konstruksiyon ng ika-limang proyektong pabahay para sa mga umuupa at informal settlers, sa isang groundbreaking ceremony, kahapon.
Pinangunahan ni Mayor Francisco “Isko Moreno” Domagoso ang groundbreaking ceremony ng 20-storey Pedro Gil Residences na matatagpuan sa kanto ng Augusto Francisco at Perlita streets sa San Andres Bukid.
Ayon kay Mayor Isko, ang konstruksiyon ng nasabing housing project ay naglalayong itaas ang estado ng mga informal settlers sa kabiserang lungsod ng bansa.
“Habang busy tayong tumatakas sa pandemya, kailangan ituloy ang ating mga pangarap. Nakapapagod. Pero hindi baleng pagod basta makita kong nakangiti kayo masaya na ako,” anang alkalde.
“We will not stop. We will put roof over people’s heads. Bibigyan natin ng kapanatagan sa pamumuhay ang mga taong habangbuhay na lang nangungupahan. We will give them homes,” dadag ni Mayor Isko.
Kasama ni Mayor Isko si Vice Mayor Honey Lacuna-Pangan, City Engr. Armand Andres, City Arch. Ely Balmoris, at City Health Officer Arnold Pangan sa nasabing seremonya.
Ang Pedro Gil Residences ay may 309 residential units: 125 parking slots, health center, limang elevator sa residential units, swimming pool, activity lawn, function room, fitness center, roof garden sa 6th floor roof deck, limang units ng paupahang espasyo, outdoor activity area sa 7F, 13F, at 18F, at basketball court sa roof deck.
Kamakailan, sinimulan na rin ng pamahalaang lungsod ang konstruksiyon ng San Lazaro Residences bilang bahagi ng housing program ng Maynila.
Kaugnay nito, target ng pamahalaang lungsod ng Maynila na tapusin ang konstruksiyon ng Tondomnium 1 & 2, ganoon din ang Binondominium, sa loob ng taong kasalukuyan.
